ភ្នំពេញ៖ នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានប្រកាសដាក់ឱ្យអនុវត្តជាផ្លូវការ «យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨» នាព្រឹកថ្ងៃទី១០ ខែតុលា ឆ្នាំ២០២៣ ដែលគោលនយោបាយនេះដាក់ចេញឡើងដើម្បីលើកស្ទួយជីវភាពរបស់ពលរដ្ឋប្រកបមុខរបរសេដ្ឋកិច្ចក្រៅប្រព័ន្ធ។

នាយករដ្ឋមន្ត្រី សម្តេចធិបតី ហ៊ុន ម៉ាណែត បានលើកឡើងថា ការដាក់ឱ្យអនុវត្តគោលនយោបាយនេះគឺដូចជាព្រួយមួយបាញ់បានសត្វបី ពោលគឺកាត់បន្ថយភាពក្រីក្រ វិសមភាពសង្គម ពង្រឹងភាពធន់នៃសេដ្ឋកិច្ចសង្គមជាតិ និងជំរុញកំណើនសេដ្ឋកិច្ច។

សម្តេចធិបតី បានណែនាំឱ្យសហគ្រាសមីក្រូធុនធំ តូច និងមធ្យម មកចុះឈ្មោះក្នុងបញ្ជីដោយស្ម័គ្រចិត្តក្នុងដំណាក់កាលអន្តរកាល ដើម្បីឱ្យរដ្ឋអាចជួយឱ្យដល់ចំគោលដៅតែម្តង ហើយរដ្ឋក៏បាននូវធនធានមនុស្ស និងកម្លាំងសេដ្ឋកិច្ចកាន់តែមានសក្តានុពលចូលរួមលើកស្ទួយសេដ្ឋកិច្ចជាតិ។ តែយ៉ាងណាសម្តេចធិបតី អះអាងថា រាជរដ្ឋាភិបាលមិនមានការបង្គំឱ្យពលរដ្ឋប្រកបមុខរបរក្រៅប្រទេសមកចុះបញ្ជីដែរ។

នាយករដ្ឋមន្ត្រីថ្លែងថា៖ «យើងចង់បានបងប្អូនឱ្យច្រើនចូលរួមនៅក្នុងដំណាក់កាលអន្តរកាលនេះ ដើម្បីងាយស្រួលដល់រដ្ឋាភិបាលចង់បានទិន្នន័យងាយស្រួលក្នុងការគ្រប់គ្រង និងដាក់ចេញនូវគោលនយោបាយដើម្បីជួយបងប្អូនឱ្យទាន់ពេលវេលា និងចំគោលដៅ ជាពិសេសចំពេលវេលាលំបាក»។

បើតាមសម្តេចធិបតី ហ៊ុន ម៉ាណែត សហគ្រាសមីក្រូធុនធំ តូច និងមធ្យម ដែលមកចុះឈ្មោះបញ្ជីដោយស្ម័គ្រចិត្តក្នុងដំណាក់កាលអន្តរកាលនេះនឹងទទួលបានសារប្រយោជន៍ដូចជា ការលើកលែងពិន័យនានា បំណុលពន្ធចំពោះការបំពេញអនុលោមភាពកន្លងទៅ និងការផ្តល់ការលើកចិត្តខាងពន្ធដារផ្សេងៗ។

យោងតាមឯកសារស្តីពី «យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨» នៅប្រទេសកម្ពុជាមានការងារធ្វើមានចំនួនសរុបជិត ៧,៩លាននាក់ ក្នុងនោះប្រជាជនមានការងារធ្វើក្នុងវិស័យក្នុងប្រព័ន្ធមានចំនួនជិត ១,៧លាននាក់ ឬ ២១,៥ភាគរយនៃប្រជាជនមានការងារធ្វើសរុប ដោយឡែកប្រជាជនចំនួនជិត ៦,២លាននាក់ផ្សេងទៀត មានការងារធ្វើក្នុងក្រៅប្រព័ន្ធ។

សេដ្ឋកិច្ចក្រៅប្រព័ន្ធ (Informal Economy) បាននិងកំពុងចូលរួមចំណែកយ៉ាងសំខាន់ក្នុង ការបង្កើតអាជីវកម្ម មុខរបរ និងការងារ និងជាប្រភពចំណូលដ៏ចម្បងរបស់ប្រជាជនជាច្រើននៅតាមបណ្ត ប្រទេសនៅលើសកលលោក ជាពិសេសប្រទេសកំពុងអភិវឌ្ឍ។

យោងតាមរបាយការណ៍របស់ធនាគារ ពិភពលោកក្នុងឆ្នាំ២០២២ សេដ្ឋកិច្ចក្រៅប្រព័ន្ធគ្របដណ្តប់ប្រមាណ ២០%នៃផលិតផលក្នុងស្រុកសរុប (ផ.ស.ស.) និងប្រមាណ ១៦%នៃការងារសរុបនៅក្នុងប្រទេសអភិវឌ្ឍ និងគ្របដណ្តប់ជាមធ្យមជិត ៣២% នៃផ.ស.ស. និង ៧០%នៃការងារសរុបនៅក្នុងប្រទេសដែលមានសេដ្ឋកិច្ចកំពុងរីកលូតលាស់និងកំពុង អភិវឌ្ឍ (Emerging and Developing Countries)៕